Þann 19. október síðastliðinn tóku uppsjávarskip Skinneyjar-Þinganess, Ásgrímur Halldórsson SF-250 og Jóna Eðvalds SF-200 þátt í þyrluæfingu með TF-GRO, þyrlu Landhelgisgæslunnar.
Bæði skipin voru á leið til síldveiða vestur af Faxaflóa þegar þau leituðu vars inn á Faxaflóa og létu akkeri falla inn á Stakkafirði, norðan Njarðvíkur.
Morguninn eftir þegar búið var að létta akkerum hafði þyrla Landhelgisgæslunnar samband við áhöfnina á Ásgrími Halldórssyni og óskaði eftir að halda æfingu með áhöfn skipsins. Veðurskilyrði voru krefjandi en þóttu upplögð til æfinga í 20 til 28 m/s.
Æfð var móttaka þyrlu og flutningur sjúklings og í kjölfarið var sambærileg æfing haldin með áhöfn Jónu Eðvalds með mismunandi vindstefnu á skipið.
Æfingarnar tóku um 10 til 15 mínútur á hvort skip og að sögn Jóhannesar Danner skipstjóra á Jónu Eðvalds voru báðar áhafnir ánægðar með tækifærið til að taka þátt í æfingu með þyrlunni og um leið sjá hversu mikið fagfólk starfar hjá Landhelgisgæslunni.
Í svari frá Ásgeiri Erlendssyni, upplýsingafulltrúa Landhelgisgæslunnar gekk æfingin vel og segir Landshelgisgæsluna vilja koma kærum þökkum til áhafna fyrir fagmannleg handtök og góðar móttökur.
